Á Degi íslenskrar tungu sem haldinn var 16. nóvember síðastliðinn veitti Halldór Jörgensson, framkvæmdastjóri Microsoft Íslandi, starfsmönnum þýðingastofunnar Skjals sérstaka viðurkenningu Microsoft fyrir mikilvægt framlag þeirra við íslenska þýðingu á hugbúnaði og tæknilausnum.
Við afhendingu viðurkenningarinnar lagði Halldór áherslu á mikilvægi þess að byggja upp þekkingu, reynslu og ekki síst hefð fyrir því að tæknibúnaður og tæknilausnir séu þýddar á íslensku. „Þýðingar á þessu sviði eru nauðsynlegar til að halda tungumálinu lifandi á tímum örrar tækniþróunar. Ef við sofnum á verðinum og freistumst til að nota annað tungumál þegar kemur að tæknimálum er hætta á að íslenskan þynnist smám saman út á næstu árum og áratugum,“ sagði Halldór.
Auk þess að þýða nýjustu útgáfur Windows stýrikerfisins og Office hugbúnaðarins frá Microsoft, sem gefnar voru út síðastliðið sumar, hefur Skjal jafnframt þýtt ýmsar aðrar hugbúnaðarlausnir á vegum Microsoft, eins og til að mynda Microsoft Dynamics viðskiptahugbúnaðinn, farsímalausnir og annan tæknibúnað.
„Skjal hefur unnið frábært starf og eru starfsmenn þess vel að þessari viðurkenningu komnir. Þýðing hugbúnaðar á borð við Windows og Office er ekki bara vandasamt verk, heldur líka afar yfirgripsmikið og því afar mikilvægt að fagmannlega sé að því staðið. Skjal hefur staðist allar okkar væntingar í þeim efnum,“ sagði Halldór.
|